ASUS EeePC

　　台長終於忍唔住手了，趁住電腦公司開倉，以2398個大洋收購了一台Netbook，主要打算開工時用，因為日日揹住部重近3Kg的Notebook實在太辛苦呀.....

　　新機開張，有少少阻滯，台長買機時要求開芒睇，搞到夾硬關機，再開時個Windows有d問題，最終要出動Recovery碟打救，原來係用Ghost複製番入去，大約花20分鐘便搞定.....

　　計埋台長，公司已經有3位同事都買o左Netbook囉，果然係魅力沒法擋！

地球停轉日．天地終結時

　　搞乜鬼咁多災難片？現時電腦特技咁鬼先進，要拍套災難片話都冇咁易，效果又真假難分喎！人就係咁衰，唔見棺材唔流眼淚，拍多ｄ警剔下ｄ人都好，台長時時都覺得，人類係成個地球內最恐怖的生物，又係破壞之王，睇見近年全球暖化得咁鬼快，要在有生之年，看見兩極融化都應該冇乜難度囉.....

　　呢個故仔好簡單，只係講人類不斷破壞地球，結果招來天譴，有班外星人要重演大洪水淹沒全球，殺死晒所有人類，戲中好多個來自外太空的發光波波，原來係傳說中的挪亞方舟，吸走晒其他動物，然後外星人就啟動毀滅程序，放了好多好多好多會一變二二變四四變八八變十六的疑似鐵甲蝗蟲物體，化成好似大洪水咁，食晒ｄ生物和死物，咁地球就可以重歸渾沌，回復生氣.....

　　結局竟然係，一個女人加一個豆釘，感動到奇洛李維斯飾演的外星調查員，停止毀滅地球，的確係好化學，的確係好簡單，咁全人類就可以依然故我地繼續破壞地球了.....the end.....

　　成套戲由頭到尾，名不副實，個地球一直都冇停止轉動過，即使毀滅晒全人類，都唔覺得個地球會停轉喎，睇完個戲名，搞到台長仲以為地球停轉後會有ｄ乜o野大災難發生，原來唔係那杯茶，真係有少少失望呀！雖然真係削o左ｄ，不過災難片是對了台長脾胃的，至少套戲有ｄ警世寓意，算佢合格係啦！！

給爸爸的信【二】

父親大人台鋻：

守孝百天之期將完，周日除了您女婿和外孫女之外，全部人都齊晒，去了深圳dup骨 (但我冇去)，之後又去番上次深圳那間大漁鐵板燒大快朵頤，還有您大媳婦的侄兒都有來湊湊熱鬧，母親大人仲食到肚仔痛添.....

金融海嘯真係殺到埋身，二佬佢已經壯烈犧牲o左，唯有當抖下暑係啦，好彩仲有佢老婆頂住先，班化骨龍真係食飯唔知米貴，大佬都不是太樂觀，兩岸今日實行大三通，貨運業首當其衝，唔死得都要吊住鹽水先.....

另外，母親大人的妹妹，最近入了醫院割瘤，真係無啦啦整撻疤，今日才去探望她，佢精神都唔錯，母親大人天天也去拿飯給她吃，生老病死，果然如家常便飯.....

明天，我會跟母親大人去為您搞埋銀行戶口ｄ手尾，其他屋呀水呀電呀電話費呀等等，都已經搞定了.....



家驊　2008/12/15

Nikon D70 + Sigma 18-200mm F3.5-6.3 DC OS

　　愛攝影的台長又有新玩具啦！有行家向台長兜售二手Sigma防震天涯鏡一枚，試鏡後，台長滿意地一手交錢一手交貨，從此可以方便地去旅行拍照或替別人拍照了。

　　為了實踐一鏡走天涯，台長又特登把臣臣地的Nikon D70拿去維修兼抹塵，合體之後，台長自我感覺良好，好似又多部新機用咁款（其實只是用舊貨 =.=）。

　　天涯機及時報到，台長可以放心地幫徒弟仔和實習同學仔影畢業相啦，一定要影多ｄ靚相丫.....



【Sigma 18-200mm F3.5-6.3 DC OS】
鏡片結構：13組15片，2枚SLD及2枚非球面鏡
畫角：7.1° - 69.3°（對角）
接環物料：金屬
光圈葉數目：7片
最小光圈值：F22
最近對焦範圍：45cm
最大放大比率：1:3.9
鏡頭濾鏡口徑：72mm
體積：70x78.1mm
重量：405克

給爸爸的信【一】

父親大人台鋻：

為您的事奔波後，已有大半個月，大家的生活漸漸重回正軌，這個周末，我、二佬、家姐和佢地三條化骨龍，陪母親大人去深圳吃鐵板燒散散心，當我們過關後，媽跟我說，這是第一次跟我返深圳，亦都係第一次用ｅ道過關，好彩我地一教就識。爸，原來我沒有跟你返過深圳啊.....

這一天，我特地把你遺下的菲林相機帶埋返深圳，同大家一起拍大合照，包括在中信城市廣場的大漁鐵板燒、深圳地鐵上留影，原來媽跟姐都未搭過深圳地鐵，很大鄉里吧？媽說要申請特區護照，我們遲些會跟媽去多ｄ旅行架啦，佢話好耐冇去過台灣喎，叫我下次帶埋佢去，媽跟你一起去台灣旅行，好像已經是廿多年前了.....



家驊　2008/10/31

愛從這夜就停了

　　父親大人走了，七十有一，台長劬勞未報，未有好好讓怹多享些清福，還有許多事情都已經再沒有機會做了，留下一大堆遺撼，一大堆未了的心願。

　　曾經打算待怹身子好一點，叫齊哥哥姊姊，一起陪父親大人去一趟旅行，即使只是去逛逛澳門也好。原來，上一次一家人去旅行，已是台長唸小學的時候了。

　　曾經想一家人齊時，讓他來一張兒孫滿堂大合照，台長自以為來日方長，大把機會，始終無提出來。

　　台長工作十載，雖然跟父親大人一起住，但相見的時間卻很有限，亦不常跟怹老人家吃一頓家常便飯。從父親大人走了的第一晚，跟母親大人在家裡吃晚飯，從此三缺一。

　　父親大人自小便諄諄教晦台長，什麼「做人不要怕蝕底呀」，什麼「呢個世界邊有咁大隻蛤乸隨街跳呀」，雖然十分老套，但句句也是金石良言，台長受用一生，不敢或忘。

　　如果要數說最遺撼的事情，便是父親大人看不到台長成家立室，見證台長一輩子最重要的時刻，和抱抱怹孻子的兒子。數下數下，原來越數越多，還是算了吧，不數了。

大空奇兵．威E

　　各位朋友仔，又係影評一周o既時候啦！今日台長睇了套益智又得意o既大空奇兵．威E，一套老少咸宜的迪迪尼動畫，主要係帶出環保意識，在今時今日連南北極都極速融化的時候，正是向下一代灌輸正確的環保觀念的好時機，否則人類最終係會自食惡果.....

　　片中，有笑位，也有感動位，為免看倌們冇癮，台長就唔講詳情啦，自己入場睇啦，包唔使送鎚仔，睇啦，睇啦！！另外一提，就係片中冇乜對白，睇動作都明講乜，算是半默劇吧，有趣有趣，由於時間o既關係，台長寫住咁多先，請呀.....

老了一歲

　　嘩嘩嘩！台長又老了一歲啦！！！

　　很高興，連續兩晚，分別跟公司一班手足和老友記唱Ｋ唱鑊甘！差點唱到喉嚨發炎咁滯.....

　　踏正零時，有驚喜喎！有人送了一份台長估極都估唔到的生日禮物（如圖）.....

　　另外，老友記夾份送了半台麗確Ｒ８給台長，台長在此起誓，將來會為大家影多Ｄ靚相.....

　　^________^

兵能殺人．亦能救人

　　紅棉紛飛播種時，正是天府蒙難日，每天上班途中，整條街道仿如五月飛霜，其實只是紅棉樹正在播種，棉花包裹著種子隨風飛揚，目的正是開枝散葉.....

　　同樣，每天上班工作，都是不斷看著四川大地震的最新進展，台長雖然看慣生死，亦不禁動容，可憐天下父母心，九代單傳，大地震怒，遂絕其後.....

　　內地當局反常地持開放態度任由傳媒直擊報導，只是一次也好，以後如是也好，開放第四權，實在不是壞事，在鏡頭下，人民子弟兵艱辛奮勇拯救災民，人性真善美紛紛出籠.....

　　建國近一甲子，能令台長動容者，除此之外，還是六四，兵者，可殺人，亦可救人，懸於當權者一念之間也，還是建核電廠，好過整核子彈吧.....

　　我們的祖國，相信只會越變越好，但願永不再走回頭路~~

中央飯店．中央飯局

　　台長跟母親大人、大佬二佬闔府，到大埔道老字號中央飯店，共晉晚膳，這裡對台長一家有許多回憶，這頓飯吃出感慨萬千。

　　席間，母親大人說，台長三兄弟都是在中央飯店擺滿月酒（台長按：點解台長自己都唔知啊？），老爺子當年還在樓上9樓做黐信封。台長只記得，自幾歲懂性以後，家裡每逢有喜宴壽宴便在中央飯店辦妥，當自己上去樓上時，只是吉屋一間，當年瘋狗症盛行時，家裡的大狼狗便一度在此避難。

　　零碎的回憶片段，原來已近30年前，中央飯店裝潢不同了，古老的大鐘不見了，每張飯桌底下的痰罐亦已經一去不復還了，老夥計，不知已散佚在那兒囉，母親大人只認出當年一位話得事的老伯，是當年的職員之一，老伯揚了揚臥蠶眉，諾諾地為台長一家人追單，人情味悠然而生 ^_^

　　中央飯局，計有鎮店招牌東江鹽焗雞、生炒排骨、沙薑魚頭煲、清蒸水蛋、梅菜扣肉、金銀蛋莧菜，大佬說，中央的自家辣醬味道跟廿多年前一樣，只是顏色不同了，當年的小伙子，如今已是攜著自己的小兒子，一起重溫陳年味道，只是小兒子一股勁兒打著PSP送飯，父子倆味蕾所嚐之味，卻各自不同.....

　　石硤尾舊區，拆拆拆，拆至面目全非，最後一批七層舊公屋亦已砸至稀巴爛矣，人面草木全非，至今碩果僅存的童年回憶，中央飯店為其中之佼佼者也。

浣熊帶走了伍晃榮

　　2008年第一個颱風浣熊打到泥，同一天，講「波係圓o既」講到響晒朵o既伍晃榮，這一天，也隨風而逝，六十有七。

　　原來，好快趣咁就一世啦，原來，大家也在生命倒數，幾時會數到自己呢？

《三國之見龍卸甲》

　　台長約好同是三國迷的老友記去看劉華扮趙雲o既《三國之見龍卸甲》，大家一早已經引頸以待，仲好神心咁去看早場，遲ｄ仲有另一套《赤壁》，都係必看之選！

　　台長還記得十多年前曾經看過一套好像由日本人所拍的三國電影，但那套戲有頭冇尾，睇到媽媽聲，當然，還有大陸拍的三國演義長篇電視劇，好看，但卻並非電影啦。

　　講番呢套戲，以類似列傳方式，從第二身角度去解構呢位三國時代中的傳奇人物，製作堪稱嚴謹，算是一齣誠意之作，終歸是為了在一小時半的電影裡，講晒趙雲的一生，時間還嫌不足夠。

　　只是，對於熟讀三國演義的三國迷來說，劇本可不是把大家耳熟能詳的故事改到九彩嗎？實在令台長摸不著頭腦.....

　　片初，講趙雲（劉華）和鄉里羅平安（洪金寶）死守孤城，一個打十個都唔掂，突然有一個鬍鬚佬單拖到軍裡等主角返來，大刺刺地爬大碗飯，餓鬼投胎咁款，原來呢位竟是諸葛亮喎！！！真係估佢唔到！

　　最緊要就係.....背景係劉備未到新野之前，原來唔駛三顧草蘆，孔明就已經自動獻身幫劉備打工，睇到台長滴晒汗.....

　　另外，趙雲早在打黃巾賊的時候，就已經識得劉備，但當劉備被曹操追殺到唔見晒老婆同個仔果陣時，趙雲為失職的同鄉求情時，戲裡竟然話劉關張都唔識得趙雲係乜水喎，台長心裡又再打個凸.....

　　類似例子不勝枚舉，台長不多談了，這齣戲選角找劉華演趙雲，很好，行軍打仗場面很有氣勢，馬戰、單挑、群揪等等，算是能夠重現三國戰國時代的氣氛，對於三國迷來說，這始終是一套必看的電影。

陳年好拍檔99機之翻生記

　　台長的公司最近有革新之舉，預計將會比過往興旺，工作間亦大執位，台長把心一橫，問公司攞番近3年前沒收的一台99機泥聽，老朋友，3年沒有見面了，你可好嗎？我倆又要並肩作戰了 ^_^

　　雖然，老朋友你過時了，戳不穿那可惡的數碼加密制式，讓差人們訕笑，但你還能跟紅車白車溝通，也不算是武功盡費，寶刀雖老，卻仍不老，其實，你對大家來說，實在是太重要了，崇高地位仍不動搖！

　　這一個多事之秋的2008年，99機，再起動！！！

有趣的冷光板

　　台長最近想把舊菲林scan番出來，原本想買個可以scan埋菲林的scanner，但早排跟老友記去試過，效果麻麻地，最近試到可以利用數碼相機翻拍，但就需要有一個燈箱，把菲林照亮才行。

　　起初構思，係想搵下有冇現成的燈箱買，但好難搵，所以台長後來想到自己動手整一個，逛鴨寮街找材料，行行下，經過一間電子公司，竟然有開心大發現，店內放了一堆夜冷貨，其中，有一樣叫冷光板的東西，類似光管咁，通12v電後，便會放出冷冷的白光。

　　台長花了50塊錢把它帶回家，用火牛搭上電源後，又真係用得著喎，結果台長就咁樣好開心猛咁翻拍d舊菲林，然後在電腦上，用執相軟件，把負片轉回正片，效果都可以接受，但唔駛花千幾銀買scanner啦！

被禁錮的靈魂-----《潛水鐘與蝴蝶》

　　由真人真事改編而成的《潛水鐘與蝴蝶》，令台長感到不寒而慄，片中運用大量第一身角度，以男主角左眼視野構成電影畫面，歪斜、失焦、眨眼等等，道出了癱瘓病人那種求生不得、求死不能的命運，是如何悲慘、絕望及無助，這是四肢健全的人所無法想像。

　　除了主觀鏡頭之外，片中亦出現許多男主角回憶和幻想的片段，其中，以潛水鐘作形象化的譬如，一個人的靈魂如何被禁錮在一個動彈不得的軀殼之內，生動得來又多帶著幾分恐怖，台長看著男主角眼仔碌碌的左眼，活脫就像《午夜兇鈴》中貞子的眼晴，真係好鬼嚇人。

　　簡介一下故事，44歲的尚多明尼克鮑比，是法國時尚雜誌《Elle》的總編輯，1995年12月8日，他突然腦幹中風，患上罕見的「閉鎖症候群」，全身癱瘓，口不能言，他的左眼皮是唯一能動的部位，這是他跟外界溝通的最後一扇窗，治療師叫他以眨一下代表「是」，兩下代表「不是」，在親人及友人協助下，以拼字母方式，讓他一個字母跟一個字母地寫下一本回憶錄，一年多後完成著作，出書後第十天，他便與世長辭。尚多希望藉著這本書告訴世人，他被禁錮的靈魂永遠活著，藉著仍沒有被禁錮的思想，彷如破繭而出的蝴蝶，輕盈地飛翔到世界每個角落。

　　台長又聯想起師兄斌仔，即係用口咬住支棍仔，篤了一封email給董建華，要求安樂死的那一位癱瘓病人，難怪他當時會鐵定了心要尋死以求解脫，怪不得，怪不得也。

CJ7

　　時間過得很快，時間又改變了一切，星爺上一套戲原來都已經係3年前，戲路慢慢改變，戲份亦慢慢減少，台長寫Blog前，慣性地上網爬文，嘩，別人在Yahoo上寫的評語也有近300條，看倌對《長江7號》可謂毀譽參半.....

　　台長認同一些看倌的睇法，星爺應該係要改變，就如哥哥張國榮一樣，沒有改變，沒有突破，那就完了，古人所謂「四十以學易」，便是指每個人到達某個年齡某個階段，對某些事情的領悟便不一樣，10年前的星爺，絕對演不出《長江7號》中的風格，反之亦然，要他演回10年前的自己，他可也吃不消了。

　　許多人說，別要抱著看周星馳90年代風格笑片的心態進場，當然啦，那個時代已經過去，台長看這齣戲，沒有開懷狂笑，反而在臨尾星爺歸天後，徐嬌哭著要睡，睡醒後可以當發完一場惡夢，一切好似用Norton Ghost咁回復原狀，令人有想哭的感覺，試問以往星爺有那齣戲，會令看倌有此感覺呢？

　　所以，改戲路難，要令Fans接受更難，就像發哥一樣，他不能一輩子演Mark哥，星爺也是一樣，不能一輩子演無厘頭小丑.....

　　「做窮人，不打架，不講粗口，唔係自己o既o野就唔好要.....要做個對社會有貢戲o既人.....」呢d咁有深意o既對白，又有幾多套戲會講呢請問？

睇到嘔泡o既電影 ----- 末世凶煞

　　台長心血來潮，突然好想睇番場戲，出到旺角百老匯，咦，有套新上畫o既災難片喎.....叫做末世凶煞喎.....o岩晒台長口味丫.....咁就拿拿臨賣飛入場.....災難就係咁樣開始.....

　　之前上網睇過ｄ簡介，話會令人不適，入場坐定定就知點解啦，因為成套戲係以模擬第一身揸ＤＶ機o既角度去拍攝呀.....由頭搖到落尾.....好似食完搖頭丸咁呀.....

　　套戲頭十幾分鐘只係講男主角歡送會，悶到嗌救命，之後正式開波，怪獸出場，就搖鏡搖到嗌救命，台長從未試過睇一套戲睇到咁辛苦，加上本身有ｄ頭赤赤，但比成大拿拿六十蚊入場，老虎蟹都頂到尾.....不過台長睇完之後就頂唔蒲，要立即返屋企小睡休息一下先至得.....

　　劇情就唔講咁多了，簡單就係唔知點解有隻成棟樓咁高o既大怪物空降紐約市大肆破壞，大怪物又不斷會「必」ｄ成個人咁大隻o既類似蜘蛛小怪物出來猛咁咬人，總之就好似世界末日咁啦，但實在太多地方犯駁兼不合情理，都幾夾硬搵戲泥做，到結尾都係冇解釋到隻大怪獸的來龍去脈和如何收場，真係龍頭蛇尾.....

　　唔怪之得，套戲響周末黃金時段，在旺角百老匯戲院，都只係坐到一半人啦~~~