柔軟銀行變Windows Phone

本已塵封o既柔軟銀行，竟然可以upgrade上wm6.5，台長發現後立即同佢做手術，上網左摷右摷，flash了2個英文rom再外掛中文，都係唔掂，會自動hang機+hard reset，好彩搵到個中文版rom，冇晒以上o既煩惱，用落感覺仲好似爽過wm6添，希望唔好太食電啦.....

呢部二手柔軟銀行，係台長用過咁多部ppc之中最具生命力，真係冇得頂..... :p

一代新車勝舊車

今年17歲o既舊戰車，行o左廿幾萬公里後，終於宣告退役了，佢陪伴台長出生入死都已經9年啦，留下不少回憶，今日一劏，切斷埋台長跟舊戰友的集體回憶，不經不覺走到這裡，一切俱往矣！

巧合地，舊戰車剛服役時，正是新戰車出世之年，本應由台長接替舊戰友，現在亦由新戰友接替台長的棒了，時間跑得真快，「皮膚竟偷偷鬆了，為何用到盡了，至知那樣緊要」，E神好一首「陀飛輪」，直打進台長的心坎了。

賠了夫人又折兵

　　台長諗住趁鏟機試裝win7，點知裝極都裝唔到，都算，最弊係之前裝落個recovery軟件，一鏟機後自動彈番去半年前，都算，最慘係連我呢半年來data蒸發晒，好彩之前backup過落舊hardisk，但都唔見o左2個月data，OMG…..

老天爺在上，台長以後都唔敢再亂用recovery軟件啦~~

港殤圖輯

給爸爸的信【五】

父親大人台鋻：

對不起，已經成年冇再寫信給您，這些年來，我們都各有不同改變和發展，就先談談我吧，案頭所掛的一對揮春「事業有成」和「蜜運成功」都已一一應驗，捱了這麼多年，叫做升到做個副主任仔咁囉，最重要的是我已經找到女朋友，今年清明咪帶了她來鑽石山探您啦！母親大人說，四兄弟姊妹中就只差我未成家立室，我都希望遲d可以給母親大人喝杯新抱茶。

大佬冇乜特別轉變，但佢個仔都仲係幾乖，二佬佢學人開7-11便利店，做到得番半條人命，依家都冇回橫頭磡老家啦，太忙了，現在通常是我們入佢屋企family day，老家總是冷冷清清的。家姐個女今年做末代會考生，考得不太好冇得升預科，最弊係同日家姐個老爺過埋身，呢日想唔難忘都幾難。

其他人都不是太好，奇叔叔被巴士撞到入廠，差d冇命，依家要住老人院等人照顧，麗蓉姐最近入話肝有事住醫院，母親大人今日約了雅姨去探佢，唔知情況係點住，最弊就係貞姐，佢子宮頸癌擴散，又開刀又化療又睇中醫都搞唔掂，早幾日走了，享年只係四十八，做人真係好化學，對嗎？其實看來大家的情況並不是太好吧.....

無論點都好，我覺得還是要抱著輕鬆心情，寬容地去面對每一天，寫住咁多先，拜拜！





家驊　　2010/08/13

非夢中之甩牙兇兆

　　田園將蕪胡不歸也，這個園地被台長荒棄已久，台長最近玩一輪微博後也冷了下來，今日為了找回昔日的佬沃遊記對比同事所言，才發現呢度就泥生滿野草.....

　　前言已了，入正題，以往經常在夢裡甩牙，據稱乃大凶之兆，不久有長輩仙遊也，廿多小時前，台長臨收工時，在公司洗手間漱口，忽然甩智慧齒，不以為然，卻以不再忍受牙痛為樂，豈料半天後，傳來母親大人的妹妹之死訊，雖則她病入膏肓已久，不過未免太巧合了吧？

　　聞噩耗，憶往事，蓋台長小時候經常到外婆家裡玩，阿姨雖然少見，較生疏，唯她算是疼錫台長，焉能不悲乎？人誰無死？只望她走得舒服，別再受病魔煎敖活受罪，於願足矣！請一路走好.....