以有涯隨無涯，殆已；以有償當無償，殆而已矣。(註：第一二四句來自莊子《養生主》而第三句係我作o既)
此網誌乃源於與友人討論投票問題而引申出來，冀能意簡言賅兼通俗易明，分享所想所思，打破一些迷思。
2008年9月7日，立法會選舉2008投票日，先父同日騎鶴西去，徹夜難眠，通宵看電視直播數票，心儀候選人落選。
2012年9月9日，也是立法會選舉2012投票日，想起父親大人生前諄諄教誨：邊有咁大隻蛤乸隨街跳丫，便宜莫貪。
今屆選舉新亮點是所謂「超級區議會」的功能組別「區議會(二)」，無啦啦質多一票比我，令我手中有兩票可投。
數年來，手機幾乎每天響過不停，並非朋友call我，而是來自各行各業姓崔名蕭的call我，我一向稱之為催銷電話。
有些崔蕭先生說，我最近幫佢地做過問卷調查(但約10年前我已經拒絕再玩)，依家有禮物送比我，e.g.郵輪船票。
有些崔蕭先生說，我用緊的手機或寬頻plan就到期，續約有優惠有嘢送(簽約由最初12個月加到現時24甚至30個月)。
通常，我會禮貌地婉拒崔蕭先生的「一番好意」，但佢地次次都會問同一問題：點解有咁多優惠o既嘢你都唔要啫？
直至，崔蕭先生問到我佛都有火時，我通常都會咁答：就算你送錢比我，我就一定要要o既咩？我可以有權唔要掛？
我明，當我接受這些禮物或優惠，並非無償，而是有償，一不小心豬油蒙了心，便得不償失，賺粒糖可能會蝕間廠。
忽然，又想起大學上課時，老師講解有關「邀約」的背後o既法律精神.....
例如，當我見到有架去旺角o既小巴，價錢又啱我心水，我就可以截停佢上車，就這樣，一個交易的合約就成立了。
雖然，我和司機冇白紙黑字寫明我比幾蚊雞佢，佢就要車我出旺角，但當我上車一刻，一個雙方默許及有約束力的合約就成立了。
結論，如果我以為無啦啦可以投多張票選多個超級區議員，好似好過癮好着數，背後代價是默許功能組別繼續存在。
或許，就好像替手機或寬頻plan續約一樣吧，要簽幾耐約？12、24、30個月嗎？呢個限期會唔會係.....一萬年呢？
我想，我會拒絕這個「邀約」.....
以有償當無償？沙士後放寬自由行來港，抑或是吧啦爸爸爸的領匯上市等問題，亦可作如是觀.....【完】
2012年8月24日
2010年10月11日
柔軟銀行變Windows Phone
呢部二手柔軟銀行，係台長用過咁多部ppc之中最具生命力，真係冇得頂..... :p
2010年9月18日
2010年8月13日
給爸爸的信【五】
父親大人台鋻：
對不起，已經成年冇再寫信給您，這些年來，我們都各有不同改變和發展，就先談談我吧，案頭所掛的一對揮春「事業有成」和「蜜運成功」都已一一應驗，捱了這麼多年，叫做升到做個副主任仔咁囉，最重要的是我已經找到女朋友，今年清明咪帶了她來鑽石山探您啦！母親大人說，四兄弟姊妹中就只差我未成家立室，我都希望遲d可以給母親大人喝杯新抱茶。
大佬冇乜特別轉變，但佢個仔都仲係幾乖，二佬佢學人開7-11便利店，做到得番半條人命，依家都冇回橫頭磡老家啦，太忙了，現在通常是我們入佢屋企family day，老家總是冷冷清清的。家姐個女今年做末代會考生，考得不太好冇得升預科，最弊係同日家姐個老爺過埋身，呢日想唔難忘都幾難。
其他人都不是太好，奇叔叔被巴士撞到入廠，差d冇命，依家要住老人院等人照顧，麗蓉姐最近入話肝有事住醫院，母親大人今日約了雅姨去探佢，唔知情況係點住，最弊就係貞姐，佢子宮頸癌擴散，又開刀又化療又睇中醫都搞唔掂，早幾日走了，享年只係四十八，做人真係好化學，對嗎？其實看來大家的情況並不是太好吧.....
無論點都好，我覺得還是要抱著輕鬆心情，寬容地去面對每一天，寫住咁多先，拜拜！
家驊 2010/08/13
2010年8月10日
2009年6月20日
綠壩
今晚我在fb近況寫了一句「綠壩封殺加菲貓」，原來有d朋友仔睇唔明，造就了這篇網誌。
2009年7月1日起，中國當局規定要求在中國銷售的所有個人電腦出廠時預裝「綠壩---花季護航」的上網過濾軟件，記錄用戶所有網上活動。
當然，美其名是為了過濾色情資訊，保護兒童，實則上，司馬昭之心，路人皆見也。
綠壩會判定上網瀏覽時，所下載的圖片內如果是一大片肉色，便會被過濾掉，看不見，加菲貓因為全身d毛毛都係黃色，所以就被濾掉了，總之，有殺錯，冇放過。
曾經有人試過，電腦安裝綠壩後，即使只係開個notepad打字，例如鍵入「六四屠城」，綠壩會判定為不良資訊，notepad會被強行關閉，還有許多例子，不勝枚舉。
有乜奶油連打個字都唔比呀！妖！！
「睇唔到！又睇唔到！乜能o野都睇唔到~~~！」
咁樣，人生仲有乜嘢樂趣呢請問？
另外一提，近者有內地網民自發聲援鄧玉嬌案，遠者則有伊朗總統大選後騷亂網民用internet突破消息封鎖，中共之高瞻遠矚，可見一斑，佩服佩服，甘拜下風。
另一則網上消息：全球互聯網自由聯盟(GIFC)已開發出「綠壩」破解卸載軟件。2009年6月15日，動態網和無界網絡同時發佈綠壩剋星自由門版1.0和含卸載「綠壩」功能的無界9.5測試版。
聽見綠壩，諗起平霸！
唔係最平，唔敢稱霸！彩色電視，平霸啦！冷氣機，平霸啦！雪櫃，平霸啦！洗衣機，平霸啦！
唔係最強，唔敢稱霸！block法輪功，綠壩啦！block大紀元，綠壩啦！block六四，綠壩啦！block加菲貓，綠壩啦！
2009年5月14日
【台北遊記2009．一】
《引言》
事隔3年，繼佬沃之旅後，又再跟預科的老友記攜手出發遨遊世界，不同的是，上次域奇林是帶女朋友去，今次是帶老婆去，還有佢老婆個妹，上次湯瑪士一支公去，今次帶埋女朋友去，只有台長還是老樣子，一路走來，始終如一，原來自己上一次偕女朋友去旅行，幾乎已經是10年前的事情了。
這一天是農曆新年年初四，雖然大家早已上網做定入台簽證，可是到機場後，發現要等好耐才有得拿，已經等唔切，只好放棄，入禁區吃BurgerKing做早餐，竟然碰到一位行家，真係人生何處不相逢。去旅行，胃口特別好，上機後還很有吃勁，再吃飛機餐，眉頭也不皺一下:p。雖然是乘華航，但那是波音747，每個座位都有小屏幕，可以看戲，又可以打機，大家連線打一陣麻將便夠鐘下機了。
很快便兌了新台幣和做好落地簽證，湯瑪士成世仔第一次踏足寶島，顯得十分好奇，台長也是第一次使用高科技電子零件輔助旅行，特地為這次旅程入手GPS，配合「柔軟銀行」PPC手機的電子地圖，除了當盲公竹之外，順道玩玩Geotag Photo，離開關口，大家坐飛狗入台北市，但兜路兜到你頭暈，途中大家對台長上次去台北結識的台灣妹依芙蓮很有興趣，紛紛催促台長Call她，電話打通了，人也找對了，用半鹹淡的國語聊聊，她說現在做股票助理喎，始終只見過一次半次，又新年流流，台長只說有空便找我吃頓飯聚聚舊，她當然沒有回電啦，意料中事。
大家訂了西門町附近昆明街的新仕界飯店下榻，佔了3間房，又係台長一個人霸晒成間房，正呀！安頓好後，夜幕經已低垂，一行六人浩浩蕩蕩出發去逛西門町掃街，好多小吃，台長挑了鹹鹹的白玉米吃，大家又光顧喝苦瓜汁，台長只喝香蕉牛奶，好香甜呢！邊逛邊隨街玩夾公仔機，嘿！不枉台長苦練多年，功夫還沒丟下，夾到雞仔和豬仔，用來當手信啊，忽然遠處傳來清脆的爆炸聲，好彩唔係恐襲，只不過是有人在新年放煙花吧了。
來台第一晚，吃什麼好呢？原來域奇林早已部署好要找回上一次吃過的任吃火鍋店，可是桃花依舊，店子全非，它搬家啦，最後兜兜轉轉又回到昆明街的新店子，名曰「天外天」，大家在牛年吃牛，涮肥牛，涮得一身牛氣，最正係仲有12款名貴雪糕作甜品，吃得肚子漲漲，每位收貴折合約港幣百餘元，可謂超值。
飯後最好當然係散散步幫助消化啦！繼續浪蕩西門，第一晚，湯瑪士已急不及待掃手信了，後來信步到康定路的晉德宮，拍拍紅燈籠照後，台長動用高科技電子零件導航打道回府呀，很過癮，回飯店後，到隔鄰的頂好超級市場（即係香港的惠康）逛逛，好多開心大發現，包括有3公升裝的喜力啤啦，大大粒珍寶珠啦，還有黑人牙膏個Friend白人牙膏，原來始知天下之大，真係有白人牙膏的存在，嘖嘖稱奇也，最正係有台長最愛的麥茶，立即搜購喝個痛快，爽！
P.S. 是日湯瑪士間房無啦啦甩咗防盜鍊.....
【台北遊記2009．二】
是日年初五也，晨早未夠9點便彈起身，但大夥兒很懶洋洋，很久才出門，途經台長第一次來台灣下榻的君帥飯店，特色是要從後巷進入的，真係帥呆啦！原本想叫大家到君帥樓下的牛牛餐廳吃西式早餐，但不合大家要求，結果改到在西寧南路的「溫州大餛飩」嚐嚐牛肉麵，但談不上好吃，加上天下起毛毛細雨，令人心情吶悶，沿路偶有燒炮仗，提醒這是農曆新年，在台灣過新年，算是很特別吧？
早上11時，經過西門紅樓，但還未開門，只好乘捷運去中正紀念堂，不知何時開始，傻傻地愛上拍跳跳相，3條傻佬就在自由廣場門口跳將起來，旁人為之側目，台長上次來時，牌扁還是叫「大中至正」，過門而不入，今次再來，已變成「自由廣場」，走進紀念堂，逛不多久，便遇到一位老伯伯突然心臟病發瞓低，台長們也有份幫手叫D職員救人，幸好一會兒老伯伯已經醒番，應該沒大礙，好彩冇大吉利是啫，大家又再紀念品店掃手信，買了不少紙模型，好多款式，包括台灣地標建築物、機車、古董電話、留聲機、搖搖木馬、懷舊郵筒、財神公仔等等，多有趣呢！
當然順道逛埋隔鄰不遠處的總統府，上次來是想探阿扁，今次來就想探下小馬哥，梗係探佢地唔到啦，離遠望下照張門口相就算啦！途經書店街，係咁咦裝裝就算，醫肚大過天，大家去到衡陽路的「阿桂的店」，又吃牛肉麵啦，哇哈哈！因為域奇林十分愛吃牛肉麵，呢隻牛魔王丫，可是這間店子是全旅程中數一數二好吃的了，而且店員十分殷勤，還免費請台長們吃青瓜小食，感覺很舒服很溫暖。
行行重行行，大家邊散步又邊回到西門紅樓，終於開門了，當然第一時間入去睇下啦，原來這兒又跟我上次來有所不同，紅樓裡開通了新地方讓年青人擺攤檔買特色貨品，但係並不算很吸引，台長順手到其中一間店子為舊同事選購Lego相機頸鍊作為指定手信，唉，「你真識食.....！」
下午4點，出發去新北投浸溫泉囉！這是重點節目之一啦！浸溫泉是人生一大享受啊！乘捷運到新北投站，下車後緩步上山，先參觀即將關門的凱達格蘭博物館。後來，台長沿着上溫泉的路上，緬懷一位曾經來過相同的地方、卻又已經失去聯絡的舊同事，雖然時空不對，但台長跟她畢竟也走過同一條異地的路，讓我無無聊聊地發揮一下阿Q精神。
最後，大夥兒撐畢整條斜路，到達早已挑定的亞太溫泉生活館泡泡湯，可是卻鬧分歧，只好兵分兩路，各自各精彩，台長就一支公泡公眾湯，今次終於可是一試露天風呂的滋味了，上兩次來也沒有看到天空呀，終於如願以嚐，我愛泡湯，也愛沖涼^^。
天又黑了，各人相約在車站集合，到劍潭站旁的士林夜市掃街當晚餐，嘩，多嘢食囉，計有蚵仔煎、天婦羅、豪大大雞排、官財板、十全排骨、魯肉飯，試問有乜辦法唔飽丫？另外又去台長家姐指定的爵林杏仁酥買手信比佢 = =，原來又是她曾經去過這一間店子留下倩影，世事何其巧合？
【台北遊記2009．三】
來到台北第3天，終於看見蔚藍天空，精神為之一振，到西門紅樓附近的「永富福州魚丸」吃早飯，冇錯呀，係早飯，因為台長點了魯肉飯嘛，另外大家點了魷魚焿和魚丸粉吃，呢間D魚丸又係冇得頂，真係日日有食神。
飽餐一頓後，便到台北火車站乘火車去基隆，再轉公車到野柳地質公園睇奇岩怪石，離開煩囂的台北市，郊遊一下，台長們在公車站問路，又問警察，又問台灣妹，咁啱她們又係同車，台長和域奇林便搭訕一番，這一天，台長穿上了上次在台灣大學買的T恤，大大隻字寫住「台灣大學」，引起台灣妹的好奇。
下車後，梗係醫肚先啦，大家在海邊一間店子吃野柳沙茶板條，板條者，河粉也，還有魚丸和海鮮拉麵，所謂近海吃海，準沒錯啦！味道又是令人激賞的，下午4時前，進入地質公園，人多風大，熱鬧不已，看到一直想看的女王頭，原來很細小的，一不小心，就隨時會掉下來似的，台長知道，她也來過這兒，這是台長另一個想來的原因。在這裡，3條傻佬見到一個好似拳頭的怪石，又發神經，大玩特玩昇龍拳扮果舊石，真係低B，不過有番D童真都係好事嘅，台長臨走前又買了數包蝦片作手信。唯一不爽的，就是天一直陰陰的，如果是藍天就好了。
黃昏，乘公車返回基隆，逛過誠品書店，替好行家和好朋友買了又係指定的書本作手信，重甸甸的，拿着逛廟口夜市，大快朵頤，品嚐人參雞、當歸雞、杏仁露、蟹膀焿、油飯、墨魚小丸子、雞蛋糕，捧腹而回，台長又玩夾公仔機，夾到4個火機仔匙扣，夜了，離開喧鬧的夜市，拾步到火車站打道回府，又看到一束又一束的煙花騰空升起，原來台灣人很愛放煙花燒炮仗呢。
回到台北車站，步行回西門町，今天實在行得太累了，到摩斯漢堡包店小歇，吃個宵夜，哈哈，跟住台長又玩夾公仔機呀，今次再夾到3隻招財貓仔，好意頭丫！最後經過苦瓜汁店，台長們跟店員吹吹水，又拿店外的大大個苦瓜公仔影跳跳相，呵呵呵，白痴仔遊台灣呀！
【台北遊記2009．四】
人日，玩得太攰了，大家很晏才起床，域奇林小姨肚仔唔舒服，所以要落街找藥房買藥，順道發現了一間好多人幫襯的豬肉乾店，再到昆明街的「陳記牛肉麵」，吃最後一餐的牛肉麵，呢間都好好味，邊吃邊看電視報道木柵動物園的貓熊團團圓圓，原來今天首次公開露面，台長原本都有諗過呢日去探佢地，但係時不與我，唯有等下一次機會吧。
Checkout後，寄存好行李後，搭捷運到市政府站，轉Shuttlebus去101大樓，不來白不來，上次台長又係過門不入，沒有上頂樓看台北市全貌，今次終於一嘗素願，由於時間關係，草草在地下Foodcourt吃熱狗當Lunch，三爬兩撥便吔完，跟手飛的回飯店取行李，再搭飛狗去機場，台長個背囊重到呢..... 揹死人呀.....！
原來歡樂嘅時光，真係過得特別快。
《後記》
原本，台長希望再來台灣，希望可以搭一搭高鐵，去一去台南，畢竟台北已經去過兩次，也該跑跑其他地方，看看其他風光，可是，能夠跟老友記一起玩，那裡也是一樣的，只要能夠跟你們在一起，那裡也是樂土呀^^。
給爸爸的信【四】
父親大人台鋻：
清明節後一周，我們去青松觀探望父親大人你的父親大人、母親大人和祖母大人，母親大人向佢地祈求保祐順利抽到鑽石山d靈灰位給你，否則就要考慮在青松觀買位，預計今天就公布抽籤結果，還是隨緣吧。
月初，我地跟母親大人去大澳逛逛，還遊船河去睇中華白海豚和棚屋呢！我帶了你的相機去拍照，是用正片的呢！母親大人跟我說，卅多年前，你跟你的父親大人和母親大人曾經在大澳住過的往事，我才恍然大悟，原來竟然有d咁o既事，原來我一直以來對上一代的事情所知甚少。
當我地乘巴士經過水口村時，母親大人又談起我唸小五時，我們一家人去那裡宿營一晚吃BBQ，翌日上寶蓮寺拜神的事情，這個我倒有印象，因為我也在場，那是我唯一一次跟你們去離島宿營啦，果真往事如煙，還是往事並不如煙呢？
家驊 2009/05/14
2009年3月11日
給爸爸的信【三】
父親大人台鋻：
3月1日，我們拉大隊去東涌搭三碌伶纜車上寶蓮寺食齋，我自己對上一次，便是7年前釋智慧主持因為反對建纜車和市集搞到污煙瘴氣而聲稱要封山的事件，我那時候還是一頭長毛，話咁快纜車都落成逾年，我才第一次搭咋。
起初，舅母、大嫂和一班化骨龍都話唔敢坐，寧願搭巴士，但係難得全家人到齊，冇理由唔試下搭架，結果都係去搭，仲要搭來回添！佢地搭完又話唔驚喎，真係變得好快！有人唔敢搭纜車，母親大人少不免舊事重提我細路仔時去海洋公園唔敢搭纜車的糗事.....
還記得上一次跟你們到寶蓮寺，已經是我小五時了，即係25年前，當時婆婆也有一起來，寶剎尚在，可是卻人面全非。母親大人說起，當年去完寶蓮寺後，全家人呆在山腰等轉巴士去梅窩搭船，在那兒打蛇餅等了一兩個鐘，你說以後也怕怕了，從此便沒有再來過，只可惜這是上一次，也是最後一次。
母親大人也有拾級行上大佛，雖然中途休息數次，還好她仍可以健步行畢全程，母親大人說自己老了，可是我覺得一點也不老，多得她每朝早有去晨運吧。
屈指一算，父親大人你也走了半年有多啦，可是鑽石山的靈灰位還是未有著落，母親大人有空時還會催促我和二佬要跟緊一點，看看食環署宣布有得申請未，看來你要先到大口環呆一會兒了，遲點清明我們會來看你，到時見！
家驊 2009/03/11
2009年1月5日
日出2009
奉老細召喚去影2009年第一次日出，原本意屬同事安出馬，但因為佢休假關係，台長決定親自出馬，揸埋架戰車回家standby等天光出發，點知同事們反應十分踴躍，爭住一齊去影，結果好似變o左組團咁.....
同事們先回家小睡片刻，台長就捱通宵冇訓，呢個2009日出團終於成行，一車四人齊齊劈住入石澳，天色微明，成班人左手拿腳架，右手拿大炮咁仆落去後灘，好似諾曼第搶灘咁，當時又黑又大風又凍喎，起初見個天慢慢亮起來，又唔見太陽出泥，仲以為會睇唔到添，好彩，終於成功睇到個咸蛋黃從海面慢慢升起，大家都十二分興奮.....
台長咁大個仔都係第一次看見如廝良辰美景，真係成個人都精神爽利，2008實在不堪回首，希望呢一年就好似日出咁美好，乜o野事都順順利利啦~~
p.s.公司最後真係用成版紙出一張日出相，雖然有美中不足之處，但實在係台長入職以來從未見過，令人激賞~~
2008年12月19日
ASUS EeePC
台長終於忍唔住手了，趁住電腦公司開倉，以2398個大洋收購了一台Netbook，主要打算開工時用，因為日日揹住部重近3Kg的Notebook實在太辛苦呀.....
新機開張，有少少阻滯，台長買機時要求開芒睇，搞到夾硬關機，再開時個Windows有d問題，最終要出動Recovery碟打救，原來係用Ghost複製番入去，大約花20分鐘便搞定.....
計埋台長，公司已經有3位同事都買o左Netbook囉，果然係魅力沒法擋！
2008年12月17日
地球停轉日．天地終結時
搞乜鬼咁多災難片？現時電腦特技咁鬼先進，要拍套災難片話都冇咁易，效果又真假難分喎！人就係咁衰，唔見棺材唔流眼淚，拍多ｄ警剔下ｄ人都好，台長時時都覺得，人類係成個地球內最恐怖的生物，又係破壞之王，睇見近年全球暖化得咁鬼快，要在有生之年，看見兩極融化都應該冇乜難度囉.....
呢個故仔好簡單，只係講人類不斷破壞地球，結果招來天譴，有班外星人要重演大洪水淹沒全球，殺死晒所有人類，戲中好多個來自外太空的發光波波，原來係傳說中的挪亞方舟，吸走晒其他動物，然後外星人就啟動毀滅程序，放了好多好多好多會一變二二變四四變八八變十六的疑似鐵甲蝗蟲物體，化成好似大洪水咁，食晒ｄ生物和死物，咁地球就可以重歸渾沌，回復生氣.....
結局竟然係，一個女人加一個豆釘，感動到奇洛李維斯飾演的外星調查員，停止毀滅地球，的確係好化學，的確係好簡單，咁全人類就可以依然故我地繼續破壞地球了.....the end.....
成套戲由頭到尾，名不副實，個地球一直都冇停止轉動過，即使毀滅晒全人類，都唔覺得個地球會停轉喎，睇完個戲名，搞到台長仲以為地球停轉後會有ｄ乜o野大災難發生，原來唔係那杯茶，真係有少少失望呀！雖然真係削o左ｄ，不過災難片是對了台長脾胃的，至少套戲有ｄ警世寓意，算佢合格係啦！！
2008年12月15日
給爸爸的信【二】
父親大人台鋻：
守孝百天之期將完，周日除了您女婿和外孫女之外，全部人都齊晒，去了深圳dup骨 (但我冇去)，之後又去番上次深圳那間大漁鐵板燒大快朵頤，還有您大媳婦的侄兒都有來湊湊熱鬧，母親大人仲食到肚仔痛添.....
金融海嘯真係殺到埋身，二佬佢已經壯烈犧牲o左，唯有當抖下暑係啦，好彩仲有佢老婆頂住先，班化骨龍真係食飯唔知米貴，大佬都不是太樂觀，兩岸今日實行大三通，貨運業首當其衝，唔死得都要吊住鹽水先.....
另外，母親大人的妹妹，最近入了醫院割瘤，真係無啦啦整撻疤，今日才去探望她，佢精神都唔錯，母親大人天天也去拿飯給她吃，生老病死，果然如家常便飯.....
明天，我會跟母親大人去為您搞埋銀行戶口ｄ手尾，其他屋呀水呀電呀電話費呀等等，都已經搞定了.....
家驊 2008/12/15
2008年12月4日
Nikon D70 + Sigma 18-200mm F3.5-6.3 DC OS
愛攝影的台長又有新玩具啦！有行家向台長兜售二手Sigma防震天涯鏡一枚，試鏡後，台長滿意地一手交錢一手交貨，從此可以方便地去旅行拍照或替別人拍照了。
為了實踐一鏡走天涯，台長又特登把臣臣地的Nikon D70拿去維修兼抹塵，合體之後，台長自我感覺良好，好似又多部新機用咁款（其實只是用舊貨 =.=）。
天涯機及時報到，台長可以放心地幫徒弟仔和實習同學仔影畢業相啦，一定要影多ｄ靚相丫.....
【Sigma 18-200mm F3.5-6.3 DC OS】
鏡片結構：13組15片，2枚SLD及2枚非球面鏡
畫角：7.1° - 69.3°（對角）
接環物料：金屬
光圈葉數目：7片
最小光圈值：F22
最近對焦範圍：45cm
最大放大比率：1:3.9
鏡頭濾鏡口徑：72mm
體積：70x78.1mm
重量：405克
2008年10月31日
給爸爸的信【一】
父親大人台鋻：
為您的事奔波後，已有大半個月，大家的生活漸漸重回正軌，這個周末，我、二佬、家姐和佢地三條化骨龍，陪母親大人去深圳吃鐵板燒散散心，當我們過關後，媽跟我說，這是第一次跟我返深圳，亦都係第一次用ｅ道過關，好彩我地一教就識。爸，原來我沒有跟你返過深圳啊.....
這一天，我特地把你遺下的菲林相機帶埋返深圳，同大家一起拍大合照，包括在中信城市廣場的大漁鐵板燒、深圳地鐵上留影，原來媽跟姐都未搭過深圳地鐵，很大鄉里吧？媽說要申請特區護照，我們遲些會跟媽去多ｄ旅行架啦，佢話好耐冇去過台灣喎，叫我下次帶埋佢去，媽跟你一起去台灣旅行，好像已經是廿多年前了.....
家驊 2008/10/31