爛石王老五

　　台長的老友記域奇林已於香港回歸十周年當日成家立室，做兄弟的，當然戥老友記高興，宴會之間，舊同學絕大部份都已經或準備為人父母，人人也關心台長的感情生活，戳力地問台長幾時拉埋天窗喎，見一鑊，問一鑊，仲慘過比人見一鑊，打一鑊，如之奈何？

　　殉職消防員黃家熙的個案或堪借鏡，他在Blog裡提及自己連續虛渡了3個情人節，惹起無限同情跟婉惜，台長才驀然醒覺，自己比他更虛渡光陰，莫非註定要在生命完結前，身旁的位子仍然懸空嗎？難道要到離開紛擾的人間，才能引起別人的關心和詠懷嗎？

　　這些，那些，可能連奧賣葛都解答不了........但台長卻不想要這樣子的悲壯........

　　台長還是覺得，簡簡單單，平平凡凡，會適合自己多一些........

　　台長不想將來去Neway唱好K時，還是要揀陳小春我愛的人這些苦情歌來發洩........

　　目前，台長只能繼續當爛石王老五吧！直至另行通告為止，欽此........多謝關心........

我住石硤尾

　　其實台長沒有住過石硤尾邨，但係台長闔家人都住過，台長細路哥時都住在隔離條邨，所以也是在石硤尾長大，大個仔之後，就變成一介草民啦！

　　台長看到茂斯師弟個blog，才驀然發覺有個街頭攝影展，機不可失也，趁佢未完就去逛個圈，台長心頭一陣激動，如圖，台長細路哥時，便是在這七層大廈地下的大排檔吃西煎雙蛋早餐，七十年代的屋邨風味，早已隨風而逝，竟然仲有番張相睇下，真係想唔激動都唔得呀！

　　拆拆拆，終於要拆鬼晒佢，此情此景成追憶，二十世紀七十年代的石硤尾邨，捱到廿一世紀一十年代才消失，都算係好了得.....

昂坪三碌拎

　　昂坪三碌拎依家似乜？咪似十五隻吊桶咁.....七上八落.....吊響半空吊吊fing.....

　　據稱，有ｄ行家採訪三碌拎時做到一肚氣，經已不斷咒佢總有一天會跌架吊籮落泥，結果一語成讖，比佢地咒到了，但係.....咁咪又係做死自己.....

　　還記得，台長第一次坐吊車係海洋公園剛開幕後不久，仲係細路哥一個，記不起為什麼會害怕，只記得很害怕坐吊車，結果比老媽子捉上車，嚇到面青口唇白，諗諗下，又好似係唔知點樣聽聞果薯試過有架吊車跌過落山云云，所以先至害怕.....

　　最大問題就係，如果三碌拎重開之後，台長仲好唔好去坐呢？台長一次都未坐過呀.....