CJ7

　　時間過得很快，時間又改變了一切，星爺上一套戲原來都已經係3年前，戲路慢慢改變，戲份亦慢慢減少，台長寫Blog前，慣性地上網爬文，嘩，別人在Yahoo上寫的評語也有近300條，看倌對《長江7號》可謂毀譽參半.....

　　台長認同一些看倌的睇法，星爺應該係要改變，就如哥哥張國榮一樣，沒有改變，沒有突破，那就完了，古人所謂「四十以學易」，便是指每個人到達某個年齡某個階段，對某些事情的領悟便不一樣，10年前的星爺，絕對演不出《長江7號》中的風格，反之亦然，要他演回10年前的自己，他可也吃不消了。

　　許多人說，別要抱著看周星馳90年代風格笑片的心態進場，當然啦，那個時代已經過去，台長看這齣戲，沒有開懷狂笑，反而在臨尾星爺歸天後，徐嬌哭著要睡，睡醒後可以當發完一場惡夢，一切好似用Norton Ghost咁回復原狀，令人有想哭的感覺，試問以往星爺有那齣戲，會令看倌有此感覺呢？

　　所以，改戲路難，要令Fans接受更難，就像發哥一樣，他不能一輩子演Mark哥，星爺也是一樣，不能一輩子演無厘頭小丑.....

　　「做窮人，不打架，不講粗口，唔係自己o既o野就唔好要.....要做個對社會有貢戲o既人.....」呢d咁有深意o既對白，又有幾多套戲會講呢請問？

睇到嘔泡o既電影 ----- 末世凶煞

　　台長心血來潮，突然好想睇番場戲，出到旺角百老匯，咦，有套新上畫o既災難片喎.....叫做末世凶煞喎.....o岩晒台長口味丫.....咁就拿拿臨賣飛入場.....災難就係咁樣開始.....

　　之前上網睇過ｄ簡介，話會令人不適，入場坐定定就知點解啦，因為成套戲係以模擬第一身揸ＤＶ機o既角度去拍攝呀.....由頭搖到落尾.....好似食完搖頭丸咁呀.....

　　套戲頭十幾分鐘只係講男主角歡送會，悶到嗌救命，之後正式開波，怪獸出場，就搖鏡搖到嗌救命，台長從未試過睇一套戲睇到咁辛苦，加上本身有ｄ頭赤赤，但比成大拿拿六十蚊入場，老虎蟹都頂到尾.....不過台長睇完之後就頂唔蒲，要立即返屋企小睡休息一下先至得.....

　　劇情就唔講咁多了，簡單就係唔知點解有隻成棟樓咁高o既大怪物空降紐約市大肆破壞，大怪物又不斷會「必」ｄ成個人咁大隻o既類似蜘蛛小怪物出來猛咁咬人，總之就好似世界末日咁啦，但實在太多地方犯駁兼不合情理，都幾夾硬搵戲泥做，到結尾都係冇解釋到隻大怪獸的來龍去脈和如何收場，真係龍頭蛇尾.....

　　唔怪之得，套戲響周末黃金時段，在旺角百老匯戲院，都只係坐到一半人啦~~~

台長的瀑布公園

　　為了準備跑馬拉松，台長相約老友記一塊兒練跑，從旺角行到石硤尾，尋尋覓覓，終於在石硤尾公園找到合適的緩跑徑，發現在山坡上相連的舊公園，正是台長小時候經常遊玩的地方，因為該處有兩層水池，流水潺潺從高至低，一瀉而下，狀甚雄偉，拍得住尼瓜拉瓜大瀑布，故小時候偕玩伴稱之為瀑布公園是也！

　　那時候，台長該是小四吧，當時物質匱乏，公園新落成之時，遊人絡繹不絕，台長時常跟睦鄰同齡玩伴，先到惠康超市買魚仔餅和汽水，便喜洋洋到瀑布公園野餐一番，聽著流水之聲不絕於耳，玩玩何濟公或捉依因，童年時就如此飄過~~~

　　那時候，台長已是中一了，當年大受同學仔愛戴的英文科老師，教了大家一年便是離開學校出外進修，同學們萬般捨不得，最後有一天，半班同學仔跟老師一起到瀑布公園暢遊，玩了小半天，這個公園裡，留下許多許多可能連洗腦也洗不掉的回憶~~~

　　台長已近廿年未有踏足此地，感慨萬千，只好跟老友記在環境優雅的吸煙區裡，抽一根煙誌慶，yeah!!!