【東北遊記．第8天】遊旅順遭公安跟蹤．往大連啖大魚大肉

【2006/12/04】

凌晨5時21分的火車，雖然我們仨很近火車站，但時間太緊，最後要奔跑追車，跑出一身大汗，列車比原先delay近2小時，早上11時到大連，立即抓緊時間，到肯德基買外買後打的，就在車子內用膳，先去旅順日俄監獄，理論上博物館類型的地方一般不允許拍照，帶我們仨遊覽的女導遊便因為這問題跟細輝吵起來，結果大家不了了之，當冇事發生過，路就照帶，相就照影，逛完後在商店旁發現大肥貓，是我在北方唯一見到的貓咪。

Emma一馬領先出門口，被1名自稱公安的男子查問是否韓國人，又恐嚇Emma要坦白交待，如果查出講大話便會好麻煩云云（Emma按：那人話會檢查台長的證件咁話喎），Emma要求佢出示證件，佢又唔肯，我離遠望以為那人摟生意，後來問番Emma才知原委，但那人起初又唔敢問台長，可能台長個樣夠惡死吧？到台長走時才走埋來問我是什麼地方人士，我答佢係廣東人，接著我們仨上車飄然而去，因為我們仨的車子後原來泊了另一輛的士，估計那位仁兄的目標又係進了監獄，認錯了人吧？但係綜合起來，全個旅程都有2、3個的士佬起初都以為我們仨是韓國人。

我們仨繼續行程，到成為文物之一的旅順火車站參觀參觀，此站每天約有1至2班火車開進開出吧，跟著再去旅順軍港看軍艦，最後的士佬車我們仨到大連星海廣場，有個好大的熱氣球，但係冇開，這裡最大得益者便是細輝，佢在此找到大連實德足球隊俱樂部買到波衫了，shopping之後便在渤海之濱看看日落，大連和旅順是旅程中唯一可以看到海的地方，的士佬話下午4時要交更，要走先，埋單一計205塊，佢開口話要230塊，結果比220塊。

最後到奧林匹克廣場看五色環，便到隔鄰天天漁港豪吃海鮮，這是我們仨到大連的主要原因，所謂近海吃海，這裡的海鮮應該很鮮味，生蠔很鮮甜，最貴就係這一頓飯，502塊埋單，仲要唔肯收貼士喎！其實食完飯都只係7時左右，所以我們仨逛超市掃零食和手信，才施施然返回大連火車站趕10時的火車，這次是第3次坐硬臥，亦是最後1次在火車上過夜了。

我們早半小時上車，好多人，但唔知點解車廂很翳焗和悶熱，一看溫度計原來是攝氏29度，難為我們身上穿著羽絨和多件打底衫，真係剝都剝唔切呀！我就經整自旅程開始以來最高溫的境界，焗到成頭大汗，而細輝在上鋪飲汽水時唔覺意倒瀉，好似倒瀉籮蟹咁，好彩只係整濕床邊，沒有淋到別人。